Thayyibah
Kepergok Emak
Oleh: Dian Rehem
Akhir-akhir ini, setiap pagi dan sore, Ji’un sering kepergok masuk ke kamar emak bari ngumpetin tangannya.
Awalnya emak kaga curiga. Udah biasa ama lagunya. Tapi kesini-kesininya, tambah sering aja itu bocah ngumpetin sesuatu di kepelan tangannya. Kalo kepergok emak, tangannya langsung di kebelakangin dan mukanya kaya orang kaget. Abis itu dia langsung buru-buru lari, takut ditanya-tanya.
Lama-lama emak jadi curiga. Emak kuatir Ji’un nyolong. Entah apa yang dicolong, karna duitnya juga kaga ada.
Pas banget sore ini Ji’un kepergok lagi. Langsung kepelan tangannya dicengkeram emak ampe kenceng banget. Ketangkep basah dah, nih bocah.
“Apaan ini, Un?” tanya emak.
“Kaga Mak!” jawab Ji’un.
“Kaga apaan? Kalo kaga ada apa-apa, masa tangan lu diumpetin mulu. Coba emak liat, lu ngumpetin apa.”
“Et dah! kaga Mak! Kaga ngumpetin apa-apa,” bales Ji’un. Bilang kaga tapi genggaman tangannya mingkinan dikencengin. Pegimana emak kaga nambah curiga, coba.
“Goroh lu, ah. Coba buka tangan lu! Kalo kaga ada apa-apa masa diumpetin bae?”
Dengan paksa emak buka kepelan tangan Ji’un dan mengurai satu persatu jemarinya. Bukan perkara gampang karena setiap ditarik satu jari, empat jari yang lain melindungi dengan kuat.
Ga mao kalah, emak pun menarik paksa dua jari sekaligus. Itu pun susah. Si Ji’un tenaganya gede banget.
“Byaar … ”
Pas kepelannya udah kebuka, langsung ambyar isinya. Tumpah aur-auran semua. Akhirnya terjawab juga penasaran emak. Ternyata genggaman tangan Ji’un penuh dengan …
Beras. Iya, beras.
“Yaelah, beras doang. Kirain apaan. Ngapain lu ngumpetin beras ampe segitunya? Emang bakal apa? Jangan dibuang-buang beras, Tong. Belinya susah. Pake duit.” Emak nyerocos antara lega dan bingung.
Ji’un nunduk. Kaga tega dia mao nyaut. Takut emaknya marah.
“Heh!” sentak emak. “Kalo ditanya nyaut. Bakal apa elu ngumpetin beras saban ari? Elu mao nyelengin beras sehari segenggem?
“Kaga Mak”, buru-buru si Ji’un ngelak.
“Trus bakal apa?” cecar emak.
“Bakal ayam, Mak.”
“Hah? Bakal ayam? Ayamnya sapah? Apanan ayam kita udah pada mati maren kena telo.”
Akhirnya Ji’un patah-patah cerita. Ternyata seminggu ini dia ngumpetin beras buat ngempanin ayamnya si Lela. Kasian ayamnya Lela sering kelaparan kaga dikasih makan. Kata Lela, babanya udah seminggu kaga pulang-pulang. Jadi emaknya Lela ngirit banget, punya beras bakal masak doang. Kaga cukup kalo dibagi buat ayam.
“Ji’un pan kaga tega, Mak, ngeliat anak ayam pada ciap-ciap bae. Kesian pada kelaparan. Kita pan kalo lapar kaga enak banget, Mak. Maap ya, Mak, Ji’un kaga bilang-bilang. Abisnya takut kaga boleh kalo bilang.”
Emak cuman narik nafas dengernya. Trus mlegeg diem bae. Ji’unnya udah pegih, dia masih melongo kaya orang linglung. Satu sisi emak ngerasa kagum, tapi sisi laen ngerasa bingung. Mao diomelin, gimana. Kaga diomelin juga gimana. Jadinya cuman bisa ngenes doang dalem hati.
“Yah, abis dah, beras gua.”
