Thayyibah
MUSLIMAH PRODUKTIP
(Diartiin ame Phity dari tulisannya Mpok Asri)
“Jadi cewe kudu kerje, kudu ngasilin. Pan kalo di rumah bae mah kaga produktip.”
Begono kaum peminis bekoar. Produktip ntu maksudnye nyang ngasilin duit. Lah coba kalo di rumah bae, nadang ame laki, beuh, abis dipandang sebelah mate.
Padahal nih ye, kalo diukur ame duit, kaga bakalan ade nyang sanggup ngebayar jasa emak. Emangnye siape nyang bise ngegajih emak nyang kerjaannye saban ari dari pagi buta ampe ketemu malem lagih, kaga ade liburnye acan-acan. Et dah, ntong!
Luh tau kaga kerjaannye emak-emak. Ntaran dia bediri. Ntaran duduk, ngejogrok. Ntaran jongkok, masak, nyuci baju, nyuci piring kaga udah-udah, mindar-mandir udah kaye kitiran, ngelonin bocah, ampe molor sambil ngorok.
Cuman emak, yang mikiriiiin banget pegimane nanti nasip anaknye, bakal jadi orang ape kaga. Jungkir balik muter otak supaye duit dari laki cukup buat kebutuhan di rumahnye.
Belom lagih, jadi emak kudu pinter segala-gala. Kudu bise masak udah kaye koki, ngajarin anak udah kaye dosen, ngejagain bocah udah kaye satpam, kudu bisa ngobatin udah kaye dokter, ngatur duit udah kaye akuntan, ngajarin agame udah kaye ustajah.
Mangkenye, gawean nyang paling produktip ntu ya emak. Yang dihasilin emak bukan cuman materi, tapi die berjuang ngedidik generasi. Berharganye peran emak buat peradaban ini.
Gitu juga kenapa agame Islam ngargain banget jasanye emak. Ditaro itu surga di tapak kakinye. Bukan naro duit di genggeman tangannye buat iming-iming biar emak ninggalin rumahnye sembari ngelupain fitrahnye. Kalo ade yang bekoar ngerendahin perannye para emak, bagenin bae.
