Thayyibah
Beli Micin
Oleh: Dian Rehem
Ji’un memang rada badung. Sekolah sering bolos, tapi paling kaga tahan kalo denger emaknya ngeluh kaga punya duit. Bawaannya pengen berenti sekolah biar bisa kerja (padahal emang males).
Tapi anehnya, walaupun badung, Ji’un suka gemeteran kalo ngeliat cewek cakep.
Pernah si Ji’un disuruh ke warung ama emak beli garem ama micin. Sampe di warung ternyata ada si Ila anaknya po Uli yang cakepnya kaya bintang pelem.
Ji’un jadi tengsin mao beli gituan. Malu, lah, ganteng-ganteng, kok, beli micin. Hihihi. Jadilah si Ji’un beli keripik sebiji.
“Neng Ila, beli keripiknya atu…” katanya bari deg-degan.
“Dikit amat bang atu doang,” sahut si Ila bari cengar cengir.
“Eh, dua biji dah, ni duitnya.”
Ji’un nganggap gini duit lima rebuan lecek bari geged. Kalo kita ngeliat ekspresinya pasti ngakak. Mukanya pucet kaya ketemu memedi. Haha.
Ila pasang senyum manis bari ngangsrongin kembalian serebu.
“Makasih yaa, bang.”
Abis ngeliat senyumnya Ila, Ji’un langsung mabur, ngacir ampe terbirit-birit. Jantungnya deg-degan. Tapi senyumnya merekah. Girang bisa kongko ama neng Ila yang cakep walau cumen segitu doang. Mesem-mesem bari ketawa sampe lupa pesenan emaknya.
Sampe rumah. Jreng jreng.
“Mana garemnya tong?” tanya emak yang udah ngarep banget.
“Eh, anu Mak.”
“Anu apa?”
“Anu, garemnya abis.”
Haghaghag. Goroh itu kaga enak sodara.
Emak melotot.
“Micinnya?”
“Micinnya juga abis mak,” melas banget muka si Ji’un karena udah kapok dikaplok emaknya.
Emak ngomel.
“Yaah, pegimana ini emak mao goreng jengkol kaga ada garem ama micinnya. Bantut dah!
Lu pegimana sih, tibang beli micin doang kaga becus. Aturan lu jangan pulang kalo belom dapet. Cari sampe ketemu.
Onoh pan di warung cing Rom banyak. Ngengkean. Di warung mang Gali juga ada. Ngabreg. Udah buruan lu cari sampe ketemu,” titah emak.
Ji’un manyun dan ngerasa bersalah. Dia mao aja ke warung cing Rom atawa mang Gali, tapi duitnya pan tinggal serebu.
“Eee, anu mak, duitnya ilang masa, Mak. Kaga tau mabur kemana tuh, duit.”
Emak tambah melotot.
“Bujug dah. Elu kebangetan banget Ji’un! Tega banget dah. Duit tinggal segitu-gitunya elu ilangin.
Gua lagi ngirit biar cukup buat kita makan. Eh, elu ilangin pisan. Duh, pegimana inih? Ya Allah, Nyak, tulungin aye, Nyak.”
Emaknya Ji’un ngomel bari gegeroan enyaknya. Lucu banget dah, ada emak-emak nangis bari manggilin enyaknya yang udah wafat. Kali bocah doang yang begonoh.
Tapi Ji’un kaga ketawa. Dia diem bae bari nunduk. Ngerasa bersalah banget, kaga tega ngeliat emaknya gegeroan begitu.
Tringg! Akhirnya si Ji’un dapet ide brilian.
“Mak, goreng jengkolnya kaga usah pake garem ama micin, Mak.”
Emak melotot.
“Pegimana ceritanya goreng jengkol kaga pake gituan? trus pake apa?”
“Pake ketumbar aja ama sereh, Mak.”
“Hah?”
“Kata dokter Zaidul Akbar, ketumbar ama sereh bagus buat auto imun, Mak. Buat kekebalan tubuh. Cobain dah.”
Emak nyeradang.
“Lah, kaga begitu juga, Malih! Emang lu kata enak, goreng jengkol make ketumbar ama sereh? Bijimana rasanya?Sekalian aja lu taroin kopi ama gula batu buat bagel pala lu!”
Saking sewotnya emak, pala Ji’un dikeplak make gagang ulegan.
Bletak!
“Adaw!”
